ಮೊರಾಕ್ಕೊದಲ್ಲಿ ಭಾರೀ ಭೂಕಂಪ: 296 ಜನ ಬಲಿ.!

ವಾಷಿಂಗ್ಟನ್: ಮೊರೊಕ್ಕೊದಲ್ಲಿ ಶುಕ್ರವಾರ ರಾತ್ರಿ ಸಂಭವಿಸಿದ ಪ್ರಬಲ ಭೂಕಂಪದಲ್ಲಿ ಸುಮಾರು 300 ಜನರು ಸಾವನ್ನಪ್ಪಿದ್ದಾರೆ ಎಂದು ಅಲ್ಲಿನ ಸರ್ಕಾರ ಹೇಳಿದೆ. ಭೂಕಂಪದ ತೀವ್ರತೆ ರಿಕ್ಟರ್‌ ಮಾಪಕದಲ್ಲಿ 6.8 ದಾಖಲಾಗಿದ್ದು, ಕಂಪನದ ನಂತರ ಮಾರಕೇಶ್‌ನ ಭಯಭೀತರಾದ ನಿವಾಸಿಗಳು ಅಸಹನೀಯವಾಗಿ ಕಿರುಚುತ್ತಿದ್ದರು ಎಂದು ವರದಿಯಾಗಿದೆ.

"ತಾತ್ಕಾಲಿಕ ವರದಿಯ ಪ್ರಕಾರ ಭೂಕಂಪದಿಂದ ಅಲ್-ಹೌಜ್, ಮರಕೇಶ್, ಔರ್ಜಾಜೇಟ್, ಅಜಿಲಾಲ್, ಚಿಚೌವಾ ಮತ್ತು ತಾರೌಡಾಂಟ್ ಪ್ರಾಂತ್ಯಗಳು ಮತ್ತು ನಗರಗಳಲ್ಲಿ 296 ಜನರನ್ನು ಬಲಿಪಡೆದಿದೆ,” ಎಂದು ಮೊರಾಕ್ಕೊದ ಆಂತರಿಕ ಸಚಿವಾಲಯ ಹೇಳಿಕೆಯಲ್ಲಿ ತಿಳಿಸಿದೆ. ಘಟನೆಯಲ್ಲಿ 153 ಜನರು ಗಾಯಗೊಂಡಿದ್ದಾರೆ ಎಂದೂ ಸರ್ಕಾರ ಹೇಳಿದೆ.

ಭೂಕಂಪದ ಕೇಂದ್ರ ಬಿಂದು ಪ್ರವಾಸಿಗಳ ಹಾಟ್‌ಸ್ಪಾಟ್ ಮರಕೇಶ್‌ನ ನೈಋತ್ಯಕ್ಕೆ 44 ಮೈಲಿ (71 ಕಿಲೋಮೀಟರ್) ದೂರದಲ್ಲಿ 18.5 ಕಿಲೋಮೀಟರ್ ಆಳದಲ್ಲಿತ್ತು. ಸ್ಥಳೀಯ ಕಾಲಮಾನ ರಾತ್ರಿ 11:11ಕ್ಕೆ (22:11 ಜಿಎಂಟಿ) ಭೂಕಂಪ ಸಂಭವಿಸಿದೆ ಎಂದು ಅಮೆರಿಕದ ಜಿಯೋಲಾಜಿಕಲ್‌ ಸರ್ವೇ ತಿಳಿಸಿದೆ.